Fokk Ofbeldi
FO vettlingarnir 2022
Fokk ofbeldi herferðin leit fyrst dagsins ljós þegar UN Women á Íslandi hóf sölu á Fokk ofbeldi armböndum árið 2015. Síðan þá hefur ýmiss konar Fokk ofbeldi varningur verið framleiddur og seldur til styrktar verkefna UN Women sem miða að því að útrýma kynbundnu ofbeldi. Frasinn hefur á stuttum tíma fest sig rækilega í sessi sem slagorð í baráttunni gegn kynbundnu ofbeldi á Íslandi.
Vísvitandi var ákveðið að hafa orðalagið ögrandi í von um að það myndi hreyfa við fólki og vekja til vitundar um baráttuna gegn ofbeldi gegn konum. Ef frasinn fer fyrir brjóstið á fólki er mikilvægt að muna að ein af hverjum þremur konum verður fyrir ofbeldi á lífsleiðinni og 39 þúsund stúlkur eru þvingaðar í hjónaband á hverjum einasta degi.
Armbönd
FO-armböndin mörkuðu upphaf Fokk ofbeldi herferðarinnar veturinn 2015 en þau seldust upp á innan við tveimur vikum. Lyfja var helsti bakhjarl verkefnisins og seldi auk þess armbandið í verslunum sínum. Heildarágóði sölunnar var rúmar fjórar milljónir sem runnu beint í styrktarsjóð Sameinuðu þjóðanna til afnáms ofbeldis gegn konum.
Taupokar
Fyrsti Fokk ofbeldi taupokinn var hannaður af Kötlu Rós Völudóttur og Ragnari Má Nikulássyni í samstarfi við Sögu Sig og íslenska dansflokkinn árið 2015. Þá sátu dansararnir fyrir á myndum þar sem þau stöfuðu Fokk ofbeldi með líkömum sínum og túlkuðu þannig samtakamáttinn sem gerir okkur sterkari í baráttunni gegn kynbundnu ofbeldi.
Í ljósi mikillar eftirspurnar eftir FO- varningi létum við framleiða aðra útgáfu af FO-taupokum sumarið 2016. FO-taupokann mátti nota sem innkaupapoka, sundpoka, skólatösku og svo mætti lengi telja.
Hálsklútur
Í tilefni af 30 ára afmæli landsnefndar UN Women á Íslandi 2019 var ákveðið að framleiða glænýjan Fokk ofbeldi varning. FO-hálsklúturinn var fram svartur með fíngerðu FO-mynstri, úr coolmax efni sem bæði andar vel og þornar hratt. Klúturinn var framleiddur í takmörkuðu upplagi.
Myllumerkið #fokkofbeldi hefur verið notað á samfélagsmiðlum í tengslum við Fokk ofbeldi herferðirnar frá upphafi og við hvetjum þig eindregið til að nota það óspart.
Hægt er að styðja við þolendur kynbundins ofbeldis með því að gerast mánaðarlegur styrktaraðili UN Women.
Fokk Ofbeldi húfan 2016-2019
Fokk ofbeldi húfan hefur verið mismunandi frá ári til árs. Sú fyrsta árið 2016 var svört með hvítu FO-merki og 2017 var hún steingrá með hvítu FO-merki á steingráum miða. Árið 2018 var húfan dimmblá með hvítum FO-miða en árið 2019 var ákveðið að breyta til og var húfan svört með stóru FO-merki úr endurskini.
FO bolurinn 2020
FO bolurinn 2020 var rjómalitaður í oversized sniði úr mjúkri bómull. Framan á er ljósmynd eftir Önnu Maggý sem sýnir FO á táknmáli, túlkað af Aldísi A. Hamilton. Aftan á er frumsamið ljóð eftir GDRN um baráttuna gegn kynbundnu ofbeldi. Konur og stúlkur í neyð eru sérstaklega berskjaldaðar fyrir kynbundnu ofbeldi. Allur ágóði af sölu FO 2020 bolarins rann í að veita konum og stúlkum í Líbanon neyðaraðstoð, vend, öryggi og kraft til framtíðar. Sprengingarnar í Líbanon, 4. ágúst 2020, COVID-19 faraldurinn og djúpstæð efnahagskreppa veikja einnig stöðu kvenna og stúlkna þar í landi.
Samtals söfnuðust 11.435.312 krónur með sölu FO bolarins 2020
FO bolurinn 2021
FO bolurinn 2021 var hvítur á lit, síðerma úr veglegri bómull. Aftan á bolnum er mynd eftir Önnu Maggý ljósmyndara þar sem merking FO er sett fram í orðabókaskilgreiningu.
Allur ágóði FO bolarins 2021 rann til UN Women í Mið-Afríkulýðveldinu. Konur í Mið-Afríkulýðveldinu eru á meðal fátækustu íbúa landsins og að auki ómenntaðar og ólæsar að mestu. Óstöðugleiki, fátækt og menntunarskortur er mikill og þörf fyrir neyðaraðstoð er mikil og hefur verið viðvarandu undanfarna áratugi. Fyrir vikið er staða kvenna og stúlkna sérstaklega slæm. En UN Women gleymir ekki og er á staðnum.
Með því að kaupa FO bolinn veitir þú gleymdu konunum í Mið-Afríkulýðveldinu von og neyðaraðstoð. Hér getur þú lesið um ástandið í Mið-Afríkulýðveldinu.
Samtals söfnuðust yfir 12.068.100 kr með sölu FO bolarins 2021.
FO vettlingarnir 2022
FO vettlingarnir eru íslensk framleiðsla og hönnun. Vettlingarnir eru úr 100% merino ull, framleiddir af VARMA í takmörkuðu upplagi og fáanlegir í tveimur stærðum. Védís Jónsdóttir prjónahönnuður hannaði FO vettlingana og hugsaði beint inn í verkefnið sem varningurinn í ár styður við, en það eru málefni hinsegin fólks. Þess vegna er engin hlið eins á vettlingunum, sem undirstrikar samfélag fjölbreytileikans.
UN Women berst fyrir réttindum og hagsmunum hinsegin fólks um allan heim. Hinsegin verkefni UN Women hafa þó verið án fjármagns síðan í maí á þessu ári og því er fjárstuðningurinn sem hlýst af sölu FO vettlingana sérstaklega mikilvægur.
Með því að kaupa FO vettlingana styrkir þú hinsegin verkefni UN Women og veitir hinsegin fólki um allan heim von, stuðning og tækifæri.
