Í janúarbyrjun 2021 undirrituðu UN Women á Íslandi og Íslandsbanki samstarfssamning til tveggja ára. Með undirritun samningsins varð Íslandsbanki aðalsamstarfsaðili UN Women á Íslandi á sviði bankaþjónustu og sérstakur bakhjarl ljósbera UN Women. Ljósberar UN Women styðja við starf UN Women með mánaðarlegum framlögum og voru rúmlega níu þúsund í upphafi árs 2021.
Samstarfið við Íslandsbanka gerir UN Women á Íslandi kleift að nýta söfnunarfé samtakanna enn betur í þágu aukinna réttinda og bættra hagsmuna kvenna og stúlkna um allan heim. Íslandsbanki hefur skilgreint hlutverk sitt að vera hreyfiafl til góðra verka og vinnur bankinn að fjórum heimsmarkmiðum Sameinuðu þjóðanna. Eitt af þeim markmiðum er jafnrétti og á samningstímabilinu munu Íslandsbanki og UN Women vinna saman að verkefnum sem stuðla að því.