Styrktarsjóður Sameinuðu þjóðanna til afnáms ofbeldis gegn konum (UN Trust Fund to End Violence against Women) hefur starfað frá árinu 1996 en markmiðið með honum er að uppræta ofbeldi gegn konum og stúlkum um allan heim. Helstu áherslur sjóðsins eru að koma í veg fyrir ofbeldi gegn konum, tryggja þolendum viðeigandi aðstoð og stuðla að sterkari löggjöf og framfylgd laga um ofbeldi gegn konum.
Ofbeldi gegn konum er eitt útbreiddasta mannréttindabrot í heiminum en ein af hverjum þremur konum hefur orðið fyrir ofbeldi á lífsleiðinni. Hvert einasta samfélag í heiminum er þjakað af kynbundnu ofbeldi. Á meðan það viðgengst og refsileysi ríkir munu framfarir í jafnréttisbaráttunni ekki eiga sér stað. Kynbundið ofbeldi hefur víðtæk áhrif á samfélög í heilsufarslegu-, efnahagslegu- sem og félagslegu tilliti en þegar konur eru heilbrigðar eru samfélög heilbrigð.
Styrktarsjóðurinn hefur alla tíð lagt ríka áherslu á að styrkja grasrótarsamtök sem berjast fyrir bættri stöðu kvenna. Sjóðurinn styður við starf frjálsra félagasamtaka og samstarfsverkefni félagasamtaka og stjórnvalda víða um heim sem býðst að sækja um styrki í sjóðinn. Árlega berast sjóðnum yfir 2.000 umsóknir um styrki til verkefna en aðeins 25 verkefni hljóta styrk.
Lesa meira Styrktarverkefni sjóðsins eru fjölbreytt og konur sem þurft hafa að þola ofbeldi eru eins ólíkar og þær eru margar. Meðal samtaka sem hafa fengið styrk eru félagasamtök sem hafa það að meginmarkmiði að aðstoða jaðarsettar konur fyrir kynbundnu ofbeldi líkt og frumbyggjakonur, farandverkakonur, heimavinnandi konur, konur í vændi og kynlífsþrælkun, LGBTQ+ konur og eldri konur. Árið 2018 hélt sjóðurinn utan um 125 verkefni í 70 löndum og styrkti verkefni fyrir 5,7 milljarða íslenskra króna. Að auki úthlutaði sjóðurinn 1,3 milljörðum til 31 samtaka sem beita sér gegn kynbnundnu ofbeldi. Þar á meðal voru samtök sem vinna að því að auka lífsgæði kvenna með fatlanir og fimm sem leitast eftir að aðstoða konur á flótta. Lesa minna
