Heimsmarkmið Sameinuðu Þjóðanna um sjálfbæra þróun voru samþykkt af fulltrúum allra aðildarríkja SÞ árið 2015. Heimsmarkmiðin eru margþætt og metnaðarfull og krefjast þátttöku og samstarfs ólíkra hagsmunaaðila.
UN Women vinnur markvisst að því að bæta stöðu kvenna og jafnrétti kynjanna, sem er fimmta markmið heimsmarkmiðanna. Þar sem konur eru helmingur heimsbyggðar er nauðsynlegt að raddir kvenna fái hljómgrunn en það er grunnforsenda fyrir því hinum 16 markmiðum verði náð. Því er mikilvægt að tryggja aukna þáttöku og tækifæri kvenna á öllum sviðum samfélagsins. Kynjaójöfnuður heldur ekki einungis aftur af konum, heldur mannkyninu í heild.
Hvers vegna er fimmta markmiðið, Jafnrétti kynjanna, grunnforsenda til að ná heimsmarkmiðunum?
- Daglega eru 137 konur myrtar af hendi náins fjölskyldumeðlims.
- 15 milljónir núlifandi unglingsstúlkna (15-19 ára) hafa verið beittar kynferðislegu ofbeldi.
- 200 milljónir núlifandi stúlkna og kvenna hafa verið limlestar á kynfærum
- Ef konur og karlar hefðu sömu tækifæri á vinnumarkaði myndi landsframleiðsla heimsins hækka um 26%
- Konur eyða þrefalt fleiri klukkustundum en karlar á dag í ólaunaða umönnunar- og heimilisstörf.
- Konur er 72% allra þeirra í heiminum sem hneppt eru í mansal og kynlífsþrælkun.
- Aðeins 1 af hverjum 5 þingmönnum í heiminum er kona
- Rúmur tveir og hálfur milljarður kvenna býr í löndum þar sem konum er meinaður aðgangur að sömu atvinnutækifærum og karlmenn
- Konur og stúlkur sjá um vatnsöflun hjá rúmlega 80% heimila sem eru án aðgangs að vatni í húsnæði samkvæmt úttekt í 61 þróunarlandi.
Mikilvægt er að meta og skoða hvert og eitt heimsmarkmið út frá kynjasjónarmiðum og sjálfbærni ef við ætlum að ná heimsmarkmiðum SÞ fyrir árið 2030. Sé það ekki gert næst seint raunverulegt jafnrétti og langvarandi árangur.