Þriðjudaginn 26. september verða Hvatningarverðlaun jafnréttismála afhent á opnum fundi um jafnréttismál sem ber yfirskriftina, „Hagnýtar leiðir til að auka jafnrétti á vinnustöðum“. Þórdís Kolbrún Reykfjörð Gylfadóttir, ferðamála, iðnaðar- og nýsköpunarráðherra, mun afhenda verðlaunin. Fundurinn verður í Hátíðarsal Háskóla Íslands og hefst kl. 8.30 og stendur til kl. 10. Á fundinum ræða framsögumenn um óáþreifanlegar og áþreifanlegar hindranir gegn jafnrétti á vinnumarkaði og hagnýtar leiðir til að stuðla að auknu jafnrétti. Daði Már Kristófersson, forseti Félagsvísindasviðs Háskóla Íslands mun stýra fundi.
Að Hvatningaverðlaununum standa Atvinnuvega- og nýsköpunarráðuneytið, landsnefnd UN Women á Íslandi, Samtök atvinnulífsins og Festa – miðstöð um samfélagsábyrgð. Markmiðið með þeim er að vekja jákvæða athygli á fyrirtækjum sem sett hafa jafnrétti á oddinn og jafnframt að hvetja önnur fyrirtæki til að gera slíkt hið sama. Verðlaunin eru afhent árlega þeim fyrirtækjum sem þykja skara fram úr í jafnréttismálum. Íslandsbanki, Orkuveita Reykjavíkur og Rio Tinto Alcan hafa áður hlotið verðlaunin.
Vonumst til að sjá ykkur sem flest!
Dagskrá fundarins:
- Birna Einarsdóttir, bankastjóri Íslandsbanka, jafnrétti hjá Íslandsbanka.
- Heiðrún Lind Marteinsdóttir, framkvæmdastjóri Samtaka Fyrirtækja í Sjávarútvegi: „Úr viðjum vanans – eru fortíðardraugar sjávarútvegs að byrgja sýn?“
- Gyða Margrét Pétursdóttir, doktor í kynjafræði og dósent við Háskóla Íslands: „Ára (kynja)jafnréttis og aðrar óáþreifanlegar hindranir á íslenskum vinnumarkaði“.
- Þórdís Kolbrún R. Gylfadóttir, Ferðamála-, iðnaðar- og nýsköpunarráðherra afhendir Hvatningarverðlaun jafnréttismála 2017.