Fyrirliðar Domino´s deildar karla eru HeForShe

Home / Fréttir / Fyrirliðar Domino´s deildar karla eru HeForShe

Photo 15.3.2016 12 07 44Í dag var haldinn blaðamannafundur þar sem kynnt var til leiks nýtt samstarfsverkefni UN Women og Domino’s deildarinnar sem tekið hafa höndum saman í sameiginlegu HeForShe átaki.

Fyrirliðar karlaliða Domino´s deildarinnar skráðu sig sem HeForShe á fundinum og hétu því þar með að beita sér markvisst í baráttunni fyrir jöfnum hlut kynjanna á á öllum vígstöðvum.

Markmið átaksins er að hvetja sérstaklega karlmenn til að láta til sín taka í baráttunni fyrir kynjajafnrétti og skrá sig sem HeForShe á www.heforshe.is „Hingað til hefur gjarnan verið litið á þessa baráttu sem einkamál kvenna. Samkvæmt rannsókn á vegum UN Women verður kynjajafnrétti náð í heiminum árið 2095 ef við höldum áfram á sömu braut á sama hraða. Með stráka og karlmenn um borð er talið að kynjajafnrétti verði náð helmingi hraðar. Það hefur verið margsannað að íþróttaiðkun og þar með talið körfuboltaiðkun brýtur niður staðlaðar hugmyndir um kynin, eykur sjálfstraust stelpna og stráka og ýtir undir leiðtogahæfni. Fyrir vikið fögnum við sérstaklega þessu frábæra samstarfi,“ segir Marta Goðadóttir, kynningarstýra UN Women á Íslandi.

„Það er alltaf mikil tilhlökkun fyrir úrslitakeppnum Domino´s deildanna og núna er tilhlökkunin enn skemmtilegri og meiri með samstarfinu við HeForShe. Í undirbúningnum á þessu samstarfi höfum við verið svo heppin að kynnast enn betur þessu þarfa átaki og að fá karlmenn sérstaklega til að láta í sér heyra í baráttunni fyrri kynjajafnrétti. Jafnframt erum við í körfuboltanum afar stolt af því að UN women hafi valið það að koma í samstarf við Domino´s deildina til að vekja athygli á þessu mikilvæga málefni. Mig langar að hvetja alla karlmenn í íþróttum, ekki bara í körfubolta, til að skrá sig á vefnum www.heforshe.is og gerast þannig boðberar kynjajafnréttis,“ segir Hannes S. Jónsson formaður KKÍ.

Í dag eru einn af hverjum tólf, yfir 18 ára gamlir karlmenn hér á landi, búnir að heita því að vera HeForShe. Markmiðið er að einn af hverjum fimm verði HeForShe. Meira um HeForShe hér

Ísland getur orðið fyrsta landið til að láta raunverulegt kynjajafnrétti verða að veruleika og það á okkar tímum. En til að verða boðberar þeirra breytinga þurfum við öll að leggjast á eitt því þegar öllu er á botninn hvolft þá högnumst við öll á kynjajafnrétti. 

photo_15-3-2016_12_34_56Brynjar Þór Björnsson, fyrirliði KR, skráir sig á HeForShe.is og Justin Shouse, Stjörnunni, og Haukur Helgi Pálsson, Njarðvík, fylgjast með.

Á myndinni hér að ofan eru: Marta Goðadóttir hjá UN Women, Hannes S. Jónsson formaður KKÍ, Snædís Baldursdóttir hjá UN Women og Birgir Örn Birgisson, framkvæmdastjóri Domino´s.

Taktu þátt í HeForShe hreyfingunni hér

Myndir: KKÍ/Gunnar Freyr Steinsson

Related Posts