Empwr peysa til styrktar konum á flótta

Home / Fréttir / Empwr peysa til styrktar konum á flótta

Íslenska barnafatamerkið iglo+indi í samstarfi við landsnefnd UN Women á Íslandi kynna empwr peysuna. Peysan er hönnuð bæði fyrir börn og fullorðna og er þetta í fyrsta sinn sem iglo+indi hanna einnig flík fyrir fullorðna. Prent peysunnar er unnið úr mynstri sprottið frá Kamerún þar sem UN Women starfrækja griðastaði fyrir konur á flótta.

Aldrei hafa fleiri verið á flótta í heiminum og nú en um 65 milljónir manna eru á flótta eða á vergangi þar af helmingur konur. Þær eru sérstaklega berskjaldaðar fyrir ofbeldi og mansali en oftar en ekki eru atvinnutækifæri kvenna á flótta af skornum skammti.

UN Women starfrækir griðastaði fyrir konur á flótta víða um heim, þar á meðal í Kamerún, Austur-Kongó, Serbíu, Makedóníu, Jórdaníu og Írak. Þar gefst þeim kostur á að vinna, stunda hagnýtt nám í tungumálum, tölvuvinnslu, klæðskurði og saumaskap, viðskiptaáætlanagerð og bókhaldi. Um leið hljóta þær félagsskap og jafningjastuðning hver af annarri en margar þeirra glíma við félagslega einangrun. Griðastaðirnir eru grundvöllur fjárhagslegrar valdeflingar kvenna þar sem konum býðst einnig að fá smærri lán til eigin reksturs og koma undir sig fótunum til lengri tíma. Á griðastöðunum hljóta konurnar áfallahjálp og sálrænan stuðning auk þess sem þeim er gert kleift að finna kraft, von og gleði á ný.

Í tilefni af empwr peysunni og krafti kvenna halda iglo+indí og UN Women á Íslandi í empwr partý á Geira Smart, 1. júní kl.17. empwr peysan verður seld á staðnum, léttar veitingar í boði og Sunna Ben þeytir skífum. Svo spáir meira að segja sól – allir eru hjartanlega velkomnir!

PIPAR\TBWA og DÓTTIR gáfu vinnu sína við undirbúning átaksins auk þess sem hljómsveitin East of my Youth lánaði átakinu lagið Stronger.

Ágóði peysunnar rennur til styrktar reksturs griðastaða UN Women. Með þínum stuðningi geta konur á flótta komið undir sig fótunum og fundið öryggi á ný. Empwr peysan fæst í verslunum iglo+indi og á www.igloindi.com.

Verð fyrir barnapeysu: 5.990 kr. / Verð fyrir fullorðinspeysu: 8.990 kr.

Related Posts