Áframhaldandi samstarf íslenskra stjórnvalda og UN Women

Home / Fréttir / Áframhaldandi samstarf íslenskra stjórnvalda og UN Women

Phumzile Mlambo-Ngcuka, framkvæmdastýra UN Women og Guðlaugur Þór Þórðarson utanríkisráðherra undirrituðu nýverið rammasamning um áframhaldandi samstarf íslenskra stjórnvalda og UN Women.

Guðlaugur Þór og Phumzile Mlambo-Ngcuka. Mynd: Utanríkisráðuneyti Íslands.

Íslensk stjórnvöld hafa stutt starfsemi UN Women, þar með talið landsnefnd UN Women á Íslandi, með fjárframlögum um árabil, að mestu leyti í formi kjarnaframlaga en einnig framlaga sem renna m.a. til verkefna í Mósambík, Afganistan, Palestínu og flóttamannabúðum í Jórdaníu. Ennfremur hafa allmargir íslenskir starfsmenn verið sendir utan til starfa á vegum UN Women. Samkvæmt samningnum munu íslensk stjórnvöld verja að minnsta kosti 170 milljónum króna árlega í framlög til stofnunarinnar til viðbótar við sérstakan stuðning við verkefni UN Women í Mósambík um konur, frið og öryggi, sem hófst á síðasta ári.

 „Framlög Íslands til UN Women skipta verulegu máli og eru í takt við forystu Íslands í jafnréttismálum á alþjóðavettvangi,“ sagði Guðlaugur Þór. „Bætt staða kvenna er ekki eingöngu mannréttindamál, heldur grundvöllurinn fyrir sjálfbærri þróun og árangri á öðrum sviðum. Við getum ekki tekist á við áskoranirnar sem við stöndum frammi fyrir með hálft lið á vellinum,“ sagði hann.

Stella Samúelsdóttir, framkvæmdastýra Landsnefndar UN Women á Íslandi tekur í sama strenginn: „Það er ómetanlegt að íslensk stjórnvöld beiti sér í þágu jafnréttis á heimsvísu sem vonandi hvetur fleiri ríki til að gera slíkt hið sama.“

UN Women vinnur að því að auka virðingu fyrir mannréttindum kvenna um allan heim og auka vægi jafnréttismála hvort sem er í einstökum ríkjum eða í störfum Sameinuðu þjóðanna.

Árangurinn af störfum UN Women felst m.a. í lagabreytingum í einstaka ríkjum sem fela í sér aukið jafnrétti og taka á kynbundnu ofbeldi, aukinni stjórnmálaþátttöku kvenna og efnahagslega valdeflingu kvenna – allt aðgerðir sem hafa djúpstæð áhrif á réttarstöðu milljóna kvenna um allan heim.

Landsnefnd UN Women á Íslandi er ein fimmtán landsnefnda sem vinnur að því að vekja athygli almennings á mikilvægi kynjajafnréttis og valdeflingar kvenna og stúlkna um allan heim. Landsnefnd UN Women á Íslandi aflar fjár til verkefna UN Women um allan heim og vekur um leið almenning til vitundar um málefnið.

Related Posts