Við neyðarástand ýmist vegna átaka eða náttúruhamfara breytist líf fólks á augabragði. Fólk missir vini og ættingja, særist líkamlega og/eða andlega, missir heimili sín og innviðir samfélagsins hrynja. Neyð hefur ólík áhrif á líf kvenna og karla og kynjamismunun á sér hræðilegar birtingarmyndir.

Í neyð eru konur berskjaldaðri en nokkru sinni fyrir ofbeldi.

  • 1 af hverjum 5 konum á flótta hafa þurft að þola kynferðislegt ofbeldi
  • Af öllum þeim konum sem deyja á meðgöngu eða af barnsburði deyja 60% þeirra á átakasvæðum
  • Konur og börn eru fjórtán sinnum líklegri til að deyja við slíka neyð og stelpur eru rúmlega helmingi líklegri til að detta úr námi
  • Konum er yfirleitt haldið utan við ákvarðanatökur í neyð

UN Women veitir neyðaraðstoð í þrjátíu löndum víðs vegar um heiminn. Stofnunin starfar á vettvangi í þágu kvenna, kortleggur og gerir úttektir á þörfum kvenna og stúlkna í neyð og tryggir að tekið sé mið af þörfum kvenna við gerð viðbragðsáætlana og við veitingu neyðaraðstoðar.

Að sama skapi veitir UN Women konum og stúlkum öryggi, vernd, áfallahjálp og sálræna aðstoð í kjölfar kynbundins ofbeldis og þá aðstoð sem konum er brýnust á hverjum stað fyrir sig. UN Women dreifir sæmdarsettum til kvenna sem innihalda dömubindi og aðrar nauðsynjar sem gera konum og stúlkum kleift að halda í virðingu sína og reisn í erfiðum aðstæðum. Ávallt er tekið mið af þörfum kvenna eftir aðstæðum og er innihald sæmdarsettanna í takt við þær þarfir.

UN Women starfrækir griðastaði fyrir konur og stúlkur á flótta víðs vegar í heiminum. Meðal annars víðs vegar um Afríku í Kamerún, Nígeríu, Rúanda.

UN Women starfrækir griðastaði fyrir konur og börn þeirra í flóttamannabúðum víðsvegar um heiminn þar sem konur og börn þeirra eru óhult fyrir ofbeldi. Þar fá konur atvinnutækifæri, félagslega aðstoð, jafningjastuðning auk þess sem börn þeirra fá daggæslu. Þá fá konurnar einnig sálrænan stuðning eftir áföll og ofbeldi. Á griðastöðum UN Women gefst konum einnig kostur á að stunda hagnýtt nám t.d. í tungumálum, tölvukennslu, saumi, klæðskurði, hárgreiðslu sem dæmi en námsúrvalið er í takt við svæðisbundinn veruleika.

UN Women starfrækir nokkra griðastaði í Azraq og Zaatari flóttamannabúðunum í Jórdaníu fyrir sýrlenskar konur á flótta, fjölda griðastaða víðs vegar um Afríku; í Kamerún, Nígeríu, Níger og víðar. UN Women griðastaði fyrir Róhingjakonur er einnig að finna í Cox’s Bazar flóttamannabúðum í Bangladess sem dæmi. 

DÆMI UM VERKEFNI