Í dag lýkur 69. Kvennanefndarfundi Sameinuðu þjóðanna (CSW69), en hann var settur þann 10. mars síðastliðinn í höfuðstöðvum Sameinuðu þjóðanna í New York. Fundurinn er haldinn árlega og er vettvangur fyrir aðildarríki, frjáls félagasamtök og grasrótarhreyfingar til að koma saman, deila reynslu sinni og aðferðum í þeim tilgangi að styðja við jafnrétti og styrkja stöðu kvenna og stúlkna um allan heim.
Fundurinn er sá fjölsóttasti sinnar tegundar og sækir hann fólk hvaðanæva úr heiminum. Metþátttaka var í ár, en um 30.000 manns tóku þátt í fundinum. Stella Samúelsdóttir, framkvæmdastýra UN Women á Íslandi, var þar á meðal en hún sótti fundinn ásamt Önnu Steinsen, formanni stjórnar UN Women á Íslandi, og starfsfólki. Þrátt fyrir róstusama tíma, bakslag í jafnréttismálum um allan heim og óvissu með framhaldið, einkenndist fundurinn af miklum krafti og vilja fólks til þess að sameinast í baráttunni fyrir bættum heimi. Ásamt því að sækja fundinn og alla þá fjölmörgu hliðarviðburði sem honum fylgja, funduðu fulltrúar UN Women á Íslandi með öðrum landsnefndum UN Women í höfuðstöðvum stofnunarinnar og áttu gott samtal um stöðu verkefna, heimsmálin og áskoranirnar sem framundan eru.
Yfirlýsing aðildarríkjanna markar tímamót
Á Kvennanefndarfundi Sameinuðu þjóðanna er mikil áhersla lögð á Pekingsáttmálann, endurskoðun á honum og mat á framkvæmd hans, en sáttmálinn var upphaflega samþykktur á fjórðu kvennaráðstefnu Sþ árið 1995 í Peking, Kína. Pekingsáttmálinn er rauði þráðurinn í starfi UN Women, en í ár verða 30 ár liðin frá því leiðtogar heims gerðu með sér þetta framsækna samkomulag um jafnréttismál, sem markaði kaflaskil í réttindabaráttu kvenna.
Á öðrum degi Kvennanefndarfundarins sendu aðildarríkin frá sér sameiginlega yfirlýsingu, þar sem þau staðfesta skuldbindingar Pekingsáttmálans og aðgerðaáætlunar hans. Þá heita þau því að virða, vernda og stuðla að réttindum, jafnrétti og valdeflingu allra kvenna og stúlkna. Áhersla er lögð á nauðsyn þess að standa vörð um öll mannréttindi og grundvallarfrelsi hverrar konu og stúlku í heiminum, án undantekninga. Skuldbindingar skulu virtar gagnvart konum, friði og öryggi og áhersla lögð á nauðsyn aðkomu kvenna og forystu þeirra í friðaruppbyggingu og lausn átaka.
Í yfirlýsingunni er einnig lögð áhersla á mikilvægi þess að útrýma fátækt í allri sinni mynd. Skal það gert meðal annars með því að tryggja rétt kvenna og stúlkna til menntunar, sérstaklega á STEM-sviðum, og með því að auka opinberar fjárfestingar í umönnunarkerfum. Þá eru hinir miklu möguleikar tækninnar viðurkenndir, sem undirstrikar nauðsyn þess að loka stafrænni gjá kynjanna. Það kallar á fjárfestingu í kynjatölfræði og gögnum til að knýja fram upplýsta stefnumótun.
Yfirlýsingin skuldbindur aðildarríkin að nýju til að útrýma hvers kyns ofbeldi gegn konum og stúlkum, þar með talið stafrænu ofbeldi, áreitni á netinu og neteinelti. Ennfremur viðurkennir hún að til að ná framförum á þessum sviðum þarf fjármögnun og sterkari kerfi, bæði staðbundin og alþjóðleg.
Forseti Íslands á Kvennanefndarfundinum
Mynd: Sþ/Eskinder Debebe
Í tilefni Kvennanefndarfundarins og 30 ára afmælis Pekingsáttmálans, bauð Amina J. Mohammed, varaframkvæmdastýra Sameinuðu þjóðanna, Höllu Tómasdóttur, forseta Íslands, að taka þátt í viðburðinum Women Rise for All: Turning Hope into Action. Viðburðurinn fór fram nú í vikunni og í frétt á vefsíðu embættisins segir: ,,Forseti og varaframkvæmdastjórinn opnuðu viðburðinn með samtali um þróun mála síðustu 30 ár, þ.e. síðan Pekingsáttmálinn var samþykktur. Þá var rætt um forystuhlutverk kvenna til að ná heimsmarkmiðum Sameinuðu þjóðanna um sjálfbæra þróun (SDGs) fyrir árið 2030.“ Umræðunum stýrði Jessica Sibley, forstjóri bandaríska tímaritsins TIME.
