Konur á flótta þurfa sterkan málsvara

Home / Dæmi um styrktarverkefni / Konur á flótta þurfa sterkan málsvara

Íris Björg Kristjánsdóttir starfar fyrir UN Women í Tyrklandi

Íris Björg Kristinsdóttir er sérfræðingur á sviði mannréttinda og starfar hjá UN Women í Tyrklandi en stór hluti verkefnanna þar í landi snýr að baráttunni fyrir betra lífi sýrlenskra flóttakvenna. Á dögunum skrifaði hún grein þar sem hún fór ítarlega yfir stöðu þessara stúlkna og kvenna og hvernig UN Women er að bregðast við þörfum þeirra.

Stríðið í Sýrlandi hefur valdið umfangsmesta flóttamannastraumi sögunnar og áætlað er að í Tyrklandi búi um 3,5 milljónir sýrlensks flóttafólks, þar af eru 70% konur og börn. Konur sem verða undir í stríði og átökum eiga í mestri hættu á að þurfa að þola ofbeldi, búa við slæm lífsgæði og geta ekki séð fyrir sér og sínum í nýju landi. Vegna áframhaldandi átaka í Sýrlandi má búast við enn frekari fólksflutningum þangað á komandi mánuðum.

Meirihluti lifir langt undir fátæktarmörkum

Til að kortleggja vandann svo hægt væri að mæta þörfum flóttakvenna í Tyrklandi eftir fremsta megni var gerð úttekt á stöðu þeirra sem af frumkvæði Írisar Bjargar. Tekin voru viðtöl við 1230 konur og stúlkur þar sem fram kom að meirihluti þeirra lifir langt undir fátæktarmörkum, jafnvel við hungursneyð og eru einangraðar frá samfélaginu. Þær komast ekki inn á vinnumarkaðinn ýmist vegna fjölskylduaðstæðna, tungumálaörðugleika eða skorts á starfsþjálfun. Aðeins 15% þeirra kvenna sem rætt var við hafa einhverjar tekjur. Í skýrslunni kom einnig fram að um 70% viðmælenda tala enga tyrknesku og geta því ekki nýtt sér sjálfsögð réttindi og þjónustu þar í landi.

Þegar húsnæðismál þeirra voru könnuð kom í ljós að 36% mátu ástand sitt afar slæmt og 17% sögðust búa í óviðunandi húsnæði á borð við gluggalausar kjallaraholur eða ruslakofa. Plássleysi og troðningur er langvarandi vandamál í híbýlum flóttakvenna sem setur aukið álag á þær og eykur hættuna á því að þær verði fyrir kynferðislegu ofbeldi. Þá kom fram að aðeins 23% kvenna á aldrinum 15-17 ganga í skóla því margar þeirra hafa verið þvingaðar í hjónaband á barnsaldri og neyðast til að að sinna heimili og fjölskyldu. Viðmælendur lögðu ofuráherslu á mikilvægi þess að fá tungumálakennslu og barnagæslu svo þær gætu hlotið menntun og komist út á vinnumarkaðinn.

UN Women bætir líf kvenna

Margt hefur þegar áunnist í málefnum sýrlenskra flóttakvenna í Tyrklandi frá því að UN Women hófu að starfa í þeirra þágu árið 2016 í Tyrklandi. Til dæmis var SADA neyðarathvarfinu í Gaziantep komið á fót árið 2017 en þangað geta sýrlenskar flóttakonur sótt sér starfsþjálfun og félagslega aðstoð. Hægt er að lesa meira um árangur verkefnisins hér.

Við hjá UN Women höldum áfram að berjast fyrir bættum lífsgæðum flóttakvenna í Tyrklandi og leggjum áherslu á að valdefla stúlkur og konur. Við tryggjum þeim aðgang að þeim atvinnutækifærum, réttindum og þjónustu sem þær eiga rétt á samkvæmt alþjóðasamningum og landslögum. Þess má geta að Íris Björg og samstarfsfólk hennar hjá UN Women undirbúa nú opnun á sex öðrum neyðarathvörfum fyrir sýlenskar konur á flótta í Tyrklandi.

Related Posts