Ekki hata

Home / Fréttir / Ekki hata

Ekki hata

Nefnist ný HeForShe herferð sem UN Women á Íslandi var að hleypa af stokkunum.

Markmið herferðarinnar er að hvetja fólk til þess að skrá sig á heforshe.is og þar með skuldbinda sig til að berjast gegn netníð sem og að tileinka sér ábyrga nethegðun, beita hvorki hatursfullri orðræðu né hóta ofbeldi á netinu.

Burðarefni herferðarinnar er myndband

sem sýnir hvernig gróft kynbundið ofbeldi í garð kvenna og stelpna grasserar á spjallþráðum og kommentakerfum. Listamaðurinn Kött Grá Pje fór í rannsóknarleiðangur um netheima og safnaði saman grófum og rætnum athugasemdum ungs fólks sem á vegi hans urðu. Hann leitaði aðallega fanga á Kiwi (ASKFM), Youtube og Instagram. Athugasemdirnar sem blöstu við honum eru grófar og sýna vel það grimma og dulda kynbundna ofbeldi sem fram fer á netinu. Úr athugasemdunum samdi hann ljóð sem flutt er í myndbandinu og varpar ljósi á það rof sem myndast milli samskipta fólks í raunheimum og á internetinu, líkt og að aðrar samskiptareglur og „netikettur“ viðgangist á á því síðarnefnda.

Netníð gegn konum er vaxandi samfélagsvandamál og hefur áhrif á fleiri konur en við gerum okkur grein fyrir. Það er margþætt og á sér ólíkar birtingarmyndir. Herferðin beinir sjónum fyrst og fremst að hatursfullum athugasemdum og hótunum í garð kvenna og stúlkna á netinu, stafrænu ofbeldi (dreifingu á viðkvæmum og persónulegum upplýsingum eða myndum á netinu án samþykkis þess sem efnið snertir) og eltingum/eftirliti þegar fylgst er með þolandanum m.a. með aðstoð GPS-tækni.

Þeirri orðræðu sem sýnd er í myndbandinu er ætlað að ögra og hreyfa við fólki. Öll þau ummæli sem fram koma í myndbandinu eru nú þegar á netinu og öllum aðgengileg. Þess má geta að herferðin var unnin í góðu samstarfi við Landsbankann sem er jafnframt bakhjarl herferðarinnar.

UN Women á Íslandi hvetja alla til að beita sér gegn netníð gegn konum og stelpum, tileinka sér skynsamlegt netsiðferði.

Ert þú búinn að skrá þig

#Ekkihata

  • Þú getur tileinkað þér gott netsiðferði og verið fyrirmynd annarra á netinu

  • Þú getur tilkynnt stafrænt ofbeldi og netníð sem þú verður vitni að til lögreglu.

  • Þú getur svarað gerendum netníðs þegar þeir skrifa hatursfull ummæli og beita niðrandi orðalagi eða hótunum í garð kvenna og stelpna.

  • Þú getur rætt við barnið þitt/foreldri/vini um afleiðingar netofbeldis fyrir þann sem fyrir því verður…

  • Þú getur rætt afleiðingar netofbeldis við vini þína og smitað góðu netsiðferði áfram

Related Posts