Fimmtugasti og sjöundi fundur kvennanefndar Sameinuðu Þjóðanna (e. Convention on the Status of Women) hófst á mánudaginn sl. í New York. Markmið fundarins er að fara yfir helstu baráttumál sem snúa að bættum hag kvenna um heim allan og hvernig best megi útfæra og laga tilskipanir og ályktanir.
Í ár er þema fundarins afnám ofbeldis gegn konum og stúlkum, sem er útbreiddasta mannréttindabrot í heiminum og óhætt er að kalla ofbeldi gegn konum og stúlkum heimsfaraldur. Michelle Bachelet framkvæmdastýra UN Women ávarpaði allsherjarþingið á opnunardegi fundarins með eftirfarandi orðum: „Ofbeldi gegn konum og stúlkum er enn útbreitt og refsileysi virðist vera venjan. Við verðum að takast á við þau viðamiklu verkefni sem við stöndum frammi fyrir og beita okkur af öllum þunga fyrir því að uppræta þetta mein og að ríki taki ábyrgð á þessum málaflokki.“
Fundurinn stendur yfir í tvær vikur og er þetta frábært tækifæri fyrir aðildarríki og frjáls félagasamtök að koma saman, deila reynslu og aðferðum við að binda enda á ofbeldi gegn konum og stúlkum. Starfskonur UN Women á Íslandi taka þátt í fundinum líkt og undanfarin ár og fylgjast með spennandi hliðarviðburðum frjálsra félagasamtaka og samningaviðræðum aðildarríkja Sþ.
Við hvetjum ykkur til þess að fylgjast vel með á Facebook næstu daga. Þar munum við birtar skemmtilegar fréttir frá fundinum.
Skrifstofa landsnefndarinnar verður lokuð til 18. mars næstkomandi. Vinsamlegast sendið póst á unwomen@unwomen.is.
