Utanríkis­ráðu­neytið hefur lengi átt gott samstarf við lands­nefnd UN Women á Íslandi og árið 2014 undirritaði fulltrúi Stjórnar­ráðs Íslands yfirlýsingu um að fylgja Jafnréttissátt­mála stofnunar Sameinuðu þjóðanna um kynjajafnrétti og valdeflingu kvenna. Ári síðar undirrituðu Gunnar Bragi Sveinsson utanríkisráðherra og Guðrún Ögmundsdóttir, formaður stjórnar landsnefndar UN Women samstarfssamning utanríkisráðuneytisins við landsnefndina fyrir tímabilið 2016-2018. Um er að ræða fjórða samninginn sem undirritaður er til þriggja ára í senn. Framlög til landsnefndarinnar nema samtals 39 milljónum á gildistíma samningsins, eða 13 m.kr. á ári.

Eitt helsta markmið samningsins er að stuðla að vitundarvakningu og sinna fræðslu- og upplýsingastarfi um störf UN Women, kynjajafnrétti og málefni kvenna í þróunarlöndum. Auk þess sem landsnefndin veitir almenna ráðgjöf og umsögn vegna málefna á fjölþjóðlegum vettvangi og sinnir fræðslu um jafnréttismál fyrir sérfræðinga sem fara til starfa á vettvangi á vegum utanríkisráðuneytisins. Þá mun landsnefndin leggja aukna áherslu á að fræða almenning um þátttöku UN Women í mannúðarstarfi. Stofnunin hóf verkefnisstuðning á þeim vettvangi árið 2015 með miklum árangri, það felst í stuðningi við konur sem búa við neyð, áherslu á öryggi t.d. í flóttamannabúðum og fræðslu til samtaka sem sinna mannúðarstarfi svo fátt eitt sé nefnt.

Ráðu­neytið styður einnig markmið HeforShe-herferðar UN Women í samræmi við skuldbindingar Íslands í IMPACT-átaki UN Women. Markmið verk­efnisins er að einn af hverjum fimm karl­mönnum á Íslandi gangi til liðs við átakið fyrir árslok 2016 og styður ráðuneytið við herferð lands­nefnd­ar UN Women til að ná megi því markmiði.