„Ég geri allt til að halda börnum mínum í skóla.“

Hin fimmtuga Mereng Alima Bessela er frumkvöðull fram í fingurgóma. Hún er einstæð fimm barna móðir og býr í Kamerún. Nýverið hellti hún sér út í karllægan geira, kakóræktun. Bessela er þó ekki með öll eggin í sömu körfunni því meðfram kakóræktinni rekur hún veitingastað og stundar fiskeldi.

Bessela skorti ekki hugvitið þegar hún reið á vaðið og gerðist kakóbóndi, helstu hindranirnar sem hún mætti þó voru skortur á fjármagni og rekstrar- og viðskiptakunnáttu.

 „Barnsfaðir minn hélt framhjá mér, svo ég skildi við hann. Ég geri allt til að halda börnum mínum í skóla. Mikilvægast af öllu er að þau ljúki öll námi og fái góða vinnu,“ segir Bessela og heldur áfram.

„Reksturinn gengur vel, á veitingastaðnum mínum kokka ég hefðbundinn kamerúnskan mat sem fólk kann að meta. Árið 2017 fékk ég þá hugmynd að hefja fiskeldi. Ég eyddi í fyrstu miklum peningum í að byggja tjarnir fyrir fiskeldið en upp komu ýmis vandamál. Til dæmis ef það var trjárót í tjörninni, drakk hún allt í sig. Í fyrstu byggði ég einnig frárennslið úr leðju en svo þegar rigndi gaf það sig og fiskarnir runnu úr tjörninni. Fleiri svona vandamál blöstu við mér í ferlinu. En þegar ég fór á námskeið á vegum UN Women fékk ég hagnýtar lausnir á þessum vandamálum.

Námskeiðið er hluti af verkefni UN Women í Kamerún sem miðar að því að gera konur sjálfbærar í rekstri og viðskiptum út frá svæðisbundnum veruleika og tækifærum. „Á námskeiðunum lærði ég að smíða fiskeldisker sem virka, lærði að útbúa fiskafóður með því að nota afurðir úr heimahaga sem eru bæði ódýr og umhverfisvæn auk þess sem ég hlaut þjálfun í rekstri og viðskiptafræði sem hefur hjálpað mér að stækka fyrirtækið mitt.“

Eftir námskeiðin fékk Bessela nýja hugmynd. „Eftir skilnaðinn, náði ég að kaupa landareign, ræktaði landið upp og setti á laggirnar kakórækt. Draumur minn er að byggja mitt eigið hús. Þá get ég hætt að kokka, lifað af fiskeldi og kakóræktun og búið í mínu eigin húsi.“